醒目買Netbook全攻略

呢輪啲Netbook越出越潮，個殼又藍又紅，小妹都好想買番個出街上網扮吓潮女，但花多眼亂都唔知點揀。消委會老友話，買Netbook揀樣之餘，都要睇吓功能啱唔啱自己。首先要睇吓部腦嘅中央處理器，平價Netbook多用intel嘅Atom系列N270，再高一級N280。運算速度再快啲有 Z520、Z530、Z540。其實Netbook主要用嚟上網，處理一般簡單文書工作，處理器稍快稍慢，用家都感覺唔到，唔好嘥錢盲目追求高速。
老友又話，如果買部機嚟播放高解像影片同打機（立體遊戲），咁就要留意吓晶片組同圖像處理器，好似intel嘅945GSE晶片配GMA950圖文處理器，性能唔算好高，已足夠大部份用戶日常需求，全屏播放標清解像度嘅影片都好流暢。但播高清要用上intel嘅US15W晶片配GMA500圖像處理器。
想睇靚畫，最好選LED背光嘅屏幕，無論光度均勻、慳電、壽命較傳統嘅螢光燈更勝一籌。講到硬碟機，家好興用固態硬碟，如果需要儲存較多資料，都係用常規硬碟機嘅機款較實際。