good 考的士牌測記性

真係咁多人失業咩？黃師傅有個世姪又話要考的士牌入行，嗰日考完 Pass咗仲嚟搵我飲茶套吓入行啲料㖭。我手痕拎起佢幾本「天書」嚟，同以前我考時大不同囉，最搞笑係其中有一題：「排在的士站的頭兩輛的士，司機應該……」其中一個選擇係「把握時間吸煙。」哈哈，呢個答案啱晒啦！「梗係錯，應該係留喺車廂入面或者企喺的士旁邊呀！」世姪達摩仲話：「幾百個地方街名要記，地方題 32題限錯 3題；道路使用者守則 100題限錯 5題；仲有的士守則， 10題限錯 1題。不過好彩我天資聰敏，用咗 3晚嚟溫書就搞掂……」佢忍唔住喺度認叻，不過都真係抵讚，因為題目就唔係難，但都幾考記憶，要我再考都有啲擔心。佢仲話家考的士牌約$800搞掂，考 70分鐘，全部用電腦考，個芒仲係 Touch Screen，原來已經咁鬼高科技。